گلسه اگر سفردن

سو تک آخير عذاره سرشک روانميز

واحسرتا اولوب داخي دلده بيانميز

غرق ملال جوهر ائدر تا دم نشور

هر کاتبين کتابتيني داستانميز

هجران سوالي اولدي بيزه آزمون دهر

دوزدوخ وليک اولدي چتين امتحانميز

ائتسه طلوع طالع اميدميز اگر

بوسه وورار قدومينه هفت آسمانميز

عاجزدي کشف حالينه غواص عقل چون

مکنون بحر سرّيدي دّر گرانميز

اظهار عشقه صبح و مسا دلده يا حبيب

مرجان کيمي سرشکيدي گوزده نشانميز

قاف فراقي ترک ائده گر شاهباز عشق

بي شک تاپار صفاي وصال آشيانميز

بير يارميز گئديب سفره گلميري ولي

بو علته سپهره اوجالميش فغانميز

اوللوخ عزيز عالم امکان زمانده

گلسه اگر سفردن امام زمانميز

ايمن دگول حريم ولا شرّ کينه دن

يوخدور جهاندا ظلم عدودن امانميز

سمت وصاليدن گله بير يول بريد حق

بولوخ اولوب برات وصال ارمغانميز

اي وسعت نگاهينه بير نقطه کائنات

چوخ تنگ اولوب بيزه داخي سنسيز جهانميز

گل زينبون او وقتينه خاطر کي سويلدي

قارداش عياندي اوزده ملال نهانميز

بو وعده گاه هجريده عباسيدن صورا

کيملر اولوبدي گور يارالي پاسبانميز

بير دور اياقه قيزلاريوي سال يولا حسين

آخر دوشوب يولا گئدوري کاروانميز

بير هيأتوخ کي بيرقيميز قامت فلک

نه من کي جمله عالم اولوب نوحه خوانميز

ارض و سما منيله حسين واحسين دئيور

دوتموش بو ناله عالمي اي مهربانميز

حشره کيمين بو وادي غمدن گليليم

بويئرده چون داغيلدي بيزيم دودمانميز

غارت زماني لشکر کين چوخ يوروب بيزي

يوخ بو سبب نه دلده نه ديزده توانميز

بير نچه لحظه دشت بلاده قوناقووخ

اي سفره عطاسي گران ميزبانميز

سانما عدو ساليب بيزي ظاهرده محنته

مصداق اصطباريدي حال عيانميز

سانما خزان ووران گوله گلزاره بنزيروخ

ساخلار طراوت گل ديني خزانميز

حرّيته نشانه‌دي نه قيد و بند و جبر

قوللارداکي بويونداکي بو ريسمانميز

دور گور نجه هواي جفائيله بير به بير

گل تک داخي سارالمشوخ اي باغبانميز

دلپاک،بس علي قيزينون چوخدي محنتي

عاجزدي شرح دردينه الکن زبانميز

زينب حريمي مأمن ايمان و عشقيدي

خوشدور آخا دفاع حريمينده قانميز