کوچ از شام

بو خرابه گوشه سينده ياتما خسته جان رقيه

دورگيداق مني غمونده ايتمه باغريقان رقيه

بو خرابه يرده ياتماق دخت شاهه ناروادي

خاصه بيرقيزي که سن تک دخت شاه کربلادي

نسگلين اورکده دائم بير ساغالميان يارادي

ايدورم اودور غمونده روز و شب فغان رقيه

قورتاروب يزيد اليندن اهل بيت دلشکسته

ليک ظلم و جور اليندن هاموسي ملول و خسته

دؤشنوبله ديده گريان خرداجا مزارين اوسته

گوزلريندن اشگ حسرت اولوري روان رقيه

بو جهاندا صبر ايدن اي غم و محنت و بلايه

درد و محنتون اليندن ذره ايتمين گلايه

گيديروق بيزيله سنده دور گيداق کربوبلايه

اورگينده واردي چونکي غم بيکران رقيه

بوقدر غميله سنسيز نجه شامي ترک ائديم من

يوخ کسيم بوغربت ايچره تاکي سويلسون نئديم من

سني بو خرابه يرده کيمه تاپشيروب گئديم من

کي بو شاميده سنيله اولا همزبان رقيه

باباوين غم فراقي سني بسکي سالدي دلدن

ايله وضع و حاله قالدون گيدوب اختيارين الدن

بادظلم اسيبدي سن تک بلبلي آييردي گلدن

عاقبت خرابه اولدي سنه آشيان رقيه

منه بو چتين سفرده يار و همزبان سنيدون

تک نه همزبان بويولدا يار مهربان سنيدون

اهل کاروانه هر دم غملي نوحه‌خوان سنيدون

گيدوب ايلدون غمونده بيزي نوحه خوان رقيه

بو جهانه سن تک عاشق گلميوبدي گلمز اصلا

عشقيده ياراتدون الحق بو جهاندا شور و غوغا

درس عشقي مکتبوندن آلاجاقدي اهل معنا

عشقيوي جهانيانه ويرموسن نشان رقيه

هيچ قيزون باشي سنون تک دهريده بلالي اولماز

هيچ گل آفت خزانه بيله گلستاندا سولماز

هيچ يتيمه ني بو نوعي محن زمانه يورماز

غم و محنتيله ايتمز اوني امتحان رقيه

ستم يزيد کافر سني غصه مرگ ايديبدي

کي خرابه دن بوغمده گوگه الامان گيديبدي

ديين اولمادي يزيده کي بو قيز سنه نئديبدي

اولا تاگوزونده اشکي بو جهاندا قان رقيه

گلي بير زمان همين يئر اولي اهل عشقه ماوا

قبريوي زيارت ايلر گوزي ياشلي اهل تقوا

خرداجا مزارين اوسته بزم غم ائدلّه برپا

آغليوب ديلّه ايواي غمي جانستان رقيه

چوخلاري سالار گذارين حسرتيله بو دياره

ولي بعضيلر اوزاقدان گوز ياشين توکر عذاره

سسلر اي خداي «رزاق» نظر ائت بو جمع زاره

تا گلوب خرابه ايچره ائده‌لر فغان رقيه