کربلا

بو يئر قربانگه جاناندي، حاشا اِيلين گيت سين

ئولوم وار،قانه باتماق واردي،پروا ايلين گيت سين

بو يئر کانونِ آزادي و مأواي شهادت دور

بو يئر عشاقي کوي دلبره بزم محبت دور

بو يئر جان برکفانِ عشقه خلوتگاهِ وصلت دور

رموز خلوتِ عشاقي افشا ايلين گيت سين

گرَک ياره فدا اولماقليقا شايسته لر قالسون

محبت عالَمين سِير ايلين دلبسته لر قالسون

رها قيد تعلّق دن اولان وارسته لر قالسون

آتوب معناني باشدان فکر دنيا ايلين گيت سين

تحمل اِتمَسه هرکيمسه جور و ظلم اَعداني

گِئجه يله ترک قلسون مجمع عشاق عرفاني

قالان جان قِيدينه، درک اِيليينمز وصل جاناني

باش آلسين ادعاي عشق بيجا ايلين گيت سين

رياست اهلي ظاهرده ائدوب اسلامي دست آويز

ولي باطنده مين لر مکريله بو فرقة خون ريز

ائدوب تبليغ کفريله مرام تفرقه انگيز

بو اَمره بي طرف لر يا تماشا ايلين گيت سين

دوتوبدي چهرة اسلامي آي تک هالة ظلمت

خلافت مسندينده، دشمن قرآن و حريت

شريعت صاحبيندن جبراً ايستير تا آلا بيعت

قالا باطل ولي اسلامي احيا ايلين گيت سين

نقدري من وارام قويمام چاتا اهدافينه اعدا

گرک قانه بويانسامدا اِئدَم اؤز عهديمه ايفا

خيانت پيشه و غاصب جنايتکاريلن امّا

بئش اون گون عمردن خاطر مدارا ايلين گيت سين

مدارا ائيله‌ماق افواج گمراهيله بدعت دور

شقاوت اهلينه بيعت، جهاندا عين ذلّت دور

باش اَيماق ظالمه، انکار احکام شريعت دور

اؤزون بو ذلّت و کفره مهيا ايلين گيت سين

گرک يارسين سحاب ظلمتي خورشيدِ عاشورا

شعاع نورينه تا غرق اولا دنيا و مافيها

بودور قصديم، اِئدَم احکام ديني قانيله اِحيا

مخيردي رفاهِ جان تمنّا ايلين گيت سين

تاپوب ارکانِ دين رخنه، جفايِ قوم اعدادن

گلوبدور جانه مؤمن لر فساد و جور و ايذادن

حقيقت زنده اولماز فکرتِ امروز و فردا دن

آچيقدير يول، غم امروز و فردا ايلين گيت سين

اَزَل گوندن بودور عهديم، ئولَم دين خدا اوسته

آخا قان پيکريم دن چشمه تک عشق و وفا اوسته

قالا توپراق لار اوسته پيکريم،باشيم جدا اوسته

گرک دور دين قالا، ديندَن تبرّا ايلين گيت سين

گرکدور جوهر جانيم ائده دين گلشنين زنده

لواي عشقيم اولسون هر ايکي دونياده پاينده

قوتولسون قيد و بندِ کفردن تا نسل آينده

منيم اهدافيمي شکيله معنا ايلين گيت سين

«شکيبا» کيمسه ايستر باب عشقه محترم گلسين

گرک‌دي جان و دل‌دن اولسون اهلِ سوز و غم گلسين

قرا آغ فرقي يوخ، گلسين، عرب گلسين،عَجَم گلسين

فقط افکار شاهِ عشقي حاشا ايلين گيت سين