منيم دان اولدوروم...

(حضرت علي اصغر ع، زبانحال حضرت رباب )

آلوب سوز عطش سندن نِجه تاب وتوان اصغر

بيرآز صبر ايله بو درده بيله ايتمه فغان اصغر

شرار آهويله قلبيمي چوخ يانديروب ياخما

خجالتدور آنان حسرت گوزيله بيربيله باخما

منيم دان اولدوزوم صبحون زماني اولماميش آخما

بو پوزقون حاليوه ايتمه رُبابي باغريقان اصغر

نچه گوندور کي آثار عطش سالميش سني دلدن

علاقه کسميسن بلبل کيمي گلذاريدن گُلدن

آنان شرمنده دور سنده اولان بو غملي مُشگلدن

باخور احواليوه اشگين يوزه ايلور روان اصغر

سويا يوخدور گمانيم چون کسوب سو يوللارين لشگر

يانور سوز عطشدن خيمَه لرده آل پيغمبر

هاميدان چوخ ولي دلدن سني بو غم سالوب يکسر

بو پوزقون حالتون احواليوي ايلور بيان اصغر

سني اوچ گوندي بو آجليق سوسوزلوق حاليدن سالميش

انان ائولسون بو غم سندن اوغول تاب وتوان آلميش

بو اَمرين چاره سي تنها خداي داوره قالميش

واِلّا يوخ بوچولده بيزلره حالي يانان اصغر

سودان آيري دوشن ماهي کيمي چوخ اَل اياق چالما

آز آچ يوم لبلرين بيله ائوزوي زحمته سالما

سو فکرين آت باشيندان، يات بيرآز، آراميمي آلما

داخي بسدور مني ايتمه بيله دل ناگران اصغر

سرشگ چشميوي رخساريوه گوزدن روان ايتمه

بيرآز ايله تَحمّل سوزيله داد و فغان ايتمه

بو احوالاتيوه بيکس ربابي باغريقان ايتمه

نجه تاب ايلَسون بو درد عظمايه آنان اصغر

يوخوم سوز عطَشدن سينَه ده اصلا سود آثاري

بو قدري آغليوب چوخ اَل اَياق چالما سني تاري

داخي ايتمه خجالت موندان آرتيق بو دل افگاري

هلاک ايلور مني سينه مده کي درد نهان اصغر

کسوب آب فراتي اهل کين يوخدور داخي چاره

تاپيلمور سو خيَمده، قالموشام نالان و آواره

ائوزوم گلمور دئيَم احواليوي سلطان بي ياره

ائولوم آثاري چون اولموش وجودينده عيان اصغر

بوچولده باد ظلميله گل و گُلزاريميز سولدي

گيدوب ذوق وصفاسي، گلشنه زاغ و ذغن دولدي

سو اوستونده علمدارون قولي تندن جدا اولدي

اولوب قاني سوتک علقَم کنارينده روان اصغر

فدا ويردي آتان انصار و يارين دين و قرآنه

چاتوبلار اول فدالر عاشقانه وصل جانانه

بهشت عدنيده مهمان اولوبلار حيّ سبحانه

قالار زنده يقيندور آدلاري تاوار جهان اصغر

قالوب يالقيز آتان، يوخدور رکابينده مددکاري

بويانميش قانينه بو چولده يارانيله انصاري

قالان سَنسَن فقط، دور قويما تک اول شاه بي ياري

کمکسيز قالماسون تا سرور کون و مکان اصغر

اگرچه سِنّين آز، شانون بويوکدور ليک معناده

مُسَلَّم شيراولار هر شيرزاده وقت هَيجاده

شهامت وير نشان اکبر کيمي ميدان دعواده

بلايه صبر ايدر عاشق زمان امتحان اصغر

....

قسم ويرّم خداي قادر و رزّاق و رحمانه

مسلّط ايتمَسون اشرار و کفّاري مسلمانه

گتوردي ظلميله اشرار کوفه بيزلري جانه

چتين گورسون بو ظلمون مثليني دور زمان اصغر