مدح شمس الشموس

اِي مُقدَس بارگاهي عَرشِ اَعلادَن گؤزل

قَبرينون عَطري دَمِ جانبَخشِ عيسادَن گؤزل

اِي هُمايُون شَهريارِ مُلکِ تَسليم و رِضا

اِفتخارِ طُوس، سُلطانِ سَريرِ اِرتِضا

وِي رِضا هر بير قَضايه، نازنين آدي رِضا

تُربَتُون اَلحقّ اُولور عالمدَه ديبادَن گؤزل

فِيض آلار اِي فِيضِ حَق، عالمدَه قَبروندَن نِفوس

مِهر و مَه اِي پَرتوِ نورِ جَماليندَن عِکُوس

اُولميوب بي‌خود جَهاندا شُهرتُون شَمس‌الشُمُوس

طلعتُون مين آفتابِ عالم آرادَن گؤزل

اِي جَمالي مَظهرِ اُوصافِ حَيِّ ذُوالجَلال

ريزه‌خوارِ خوانِ فَضلون‌دور هامي اَهلِ کمال

گُون يُوزون گؤرسَه قَبول اِيلر حِجابِ اِنفعال

اِي سَوادِ تارِ زُلفي لِيلِ يَلدادَن گؤزل

گر اِئلر بلبل گُلي، پَروانه شَمعي جُستجُو

کَعبة عِشّاق دور امّا بُو قَبرِ مُشک بُو

گؤرسَه هر کيم قَبريوي، اِيتمَز بِهشتي آرزو

اِي هُمايون مَدفني فِردوسِ اَعلادَن گؤزل

اِي کَلام اللهِ ناطق، وِي کَليمَه مُقتدا

وِي غُبارِ آستاني چِشمِ حُوره تُوتيا

ظلِّ مَمدودِ اِلهي، قِبلة اَهلِ وِلا

واردي آسايِش سَنون يانوندَه طُوبادَن گؤزل

چون سَني مُمتاز اِئدوب لُطفيلَه خَلّاقِ عَليم

اُولميوب اُولماز مَقامُون دَرک اِئدَه عَقلِ سَليم

سيّدي، مَحوِ کلامِ دِل نِشينُون مين کَليم

نُورِ رُخسارون يَدِ بِيضاي مُوسادَن گؤزل

گر چه مين بير آدلانُوب عالمدَه حَيِّ لايُري

مُجتَمع‌دور بير رضا لُفظيندَه، آنلار آشنا

اِسمِ اَعظم‌دور آدون اِي اِسمِ پاکي کيميا

هاردا وار بُو اِسميدَن يا بُو مُسَمّادَن گُوزل

سَن او شَه‌سَن قَبروَه شاه و گِدا پابُوس اُولار

گؤرمَه‌سَه هر کيم مَزارون آهيلَه ماُنُوس اُولار

گَلسَه بو دَرگاهوه سائل مَگر ماُيُوس اُولار؟

اُي گؤي آلتندا رَواقي چَرخِ مينادَن گُوزل

بُو جَلاليلَه که دنياني دوتوبدور شُهرتُون

اَهلِ عشقي آغلادار امّا مَلالِ غُربتُون

هر گُوگُلدَه وار تَمنّاي شَميمِ تُربَتَون

اُولميوب اُولماز تَمنّا بو تَمنّادَن گُوزل

ذِکر اُولاندا غُربتُون اِي يادگارِ مُصطفي

طاقت و آراميمي اَلدَن آلور بير ماجَرا

گؤزلريمدَه اِيلوري جِلوه ديارِ کَربلا

جَنّةُ المَاوي يَقين اولماز او صَحرادَن گُوزل

گر چه سَن غُربتدَه جان وِئردون غَريب و دل فِکار

قويمادي اُوغلون گِنه آخر نَفَسدَه اِنتظار

باشوي گَلدي دِيز اُوسته آلدي اُولدي کامکار

سَندَه آلدون کامِ دِل اُول ماه سيمادَن گُوزل

قانه باتمشدي وَلي جَدّون حُسينون اکبري

نه واريدي بير هَواداري نه يار و ياوري

حَسرتيلَه صاق صُولا حِيران باخاردي گؤزلري

مُنتظر بير اِنتظار اُولماز او مُولادَن گُوزل

باخمادي تَخمير اُولوبدور عِشقيلَه آب و گِلي

لَشکرِ اَشراريدَن آيريلدي ناگه قاتلي

تاپدي گِردابِ مُحبّتدَه شَهِ دَريادلي

گؤردي بير قان دِجلَه‌سي، اُولماز او دَريادَن گُوزل

بيردَه گَلدي خيمه گَهدَن زِينبِ عالي تَبار

گؤردي زَهرانون گُلِ آغُوشني مَجروحِ خار

دوتدي قاتل خَنجَريندَن اِئيلدي اِيثارِ ثار

کيم مُواسات اِيليوبدي دُختِ زَهرادَن گُوزل؟

بير گئجه صدّيقة کبري بَتولين ماتمي

تاپدي دؤرد اَحباب بير مَحفلدَه اُلفَت عالمي

تا او بَزمِ شُور و وَحدت اِيچره «خوندل»، «اعظمي»

يازديلار بير شعر هر اَشعارِ زيبادَن گُوزل