طور عشق

اي جداده ذکر ايدن آيات قرآني حسين

ياره لي باشه فدادور زينبون جاني حسين

خوش سسون مَحملدَن آلجاق روحيمه گلدي صفا

ياخشي موقع بو مريض عشقيوه ويردون شفا

لطفوي کسمه بو بيکسدَن سنه جانيم فدا

قويما يالقيز دار غربتده بو نالاني حسين

قانلي باشون نيزه باشون ايليبدور طور عشق

جلوه ي انواري سالميش طور عشقه نور عشق

اهل عشقه نور عشقون آرتيريبدور شور عشق

تار ايدَنمّز اَبر ظلمَت بو تجلّاني حسين

درد هجرون ايليبدور قلبي ياره زينبي

روز و شب حسرت قويوب وصل نگاره زينبي

باشوين عشقي چکيبدور بو دياره زينبي

ايليوب مجنون کيمي مسکن بياباني حسين

اي جمالون مظهر آيات خلّاق جليل

هر ايکي دنياده سَنسَن مفخر آل خليل

نيزه ده قانلي باشون آي تک بو عنوانه دليل

مات و مبهوت ايليبدور اهل دنياني حسين

گر چه عشقونده اسير اولدوم ولي ايتمم گِله

چونکه عاشق دهريده لازمدي دوزسون مُشگله

عيبدور عاشق گتورسه گر اورک دردين دِله

صبره دعوت ايتموسن چون دخت زهراني حسين

ايتديقون نهضت بو عالمده گرکدور ياتماسون

کربلا دشتينده ظلميله آخان قان باتماسون

سعي قيلّام آل سفياني مرامه چاتماسون

اُلمَسم باشه يتورّم عهد و پيماني حسين

اي ايدن احکام دين اوستونده ئوز جانين فدا

اولموسان نوک جداده زينبيله هم صدا

سن جداد منده محملدَن ايداق با هم ندا

نور حَقّي ايليَنمز کيمسه ظُلماني حسين

گُل دوداقيندَن چيخان سوزلر کلام اللهيدور

ليک بيلمور کوفيان چون جاهل و گمراهيدور

سَن دانيش حق سوزلري، چون حَق ئوزي آگاهيدور

حيف اولا حق سوز دييَنلَر اولدي قرباني حسين

سَن اوخي قرآن، گوزل صوتيله اي شاه اَنام

تا که مشغول ايليه جمعيّتي بو خوش کلام

باخميه تا بيزلره تحقيريله قوم ظُلام

درده گتدي بو مصيبت آل طاهاني حسين

قانلي خاکستر جمال اللهي قارداش تار ايدوب

چون قضا بير گون بو باشي ميهمان خار ايدوب

ميزبان بولمم نيه سَنله بيله رفتار ايدوب

کاش قويسونلار يوزوندَن پاک ايدوم قاني حسين

دهريده دائم سني درد اهلي سَسلر دادينه

آختارار سن تک طبيبي تا يته امدادينه

لطف قيل رزّاقينوندا تيز يتيش فريادينه

قويما مشگلده قالا سن بيل آنان جاني حسين