سفر

عالمده شهادت کيمي عالي سفر اولماز

بير فيضدي بو شامل هر رهگذر اولماز

طوبي لک، طوبي لک يا سيد الاحرار

دشمنده ائدر عزت و اجلالووه اقرار

اي غرش تکبيري ائدن يئر گويي بيدار

نيزار رشادتده بئله شير نر اولماز

عالمده شهادت کيمي عالي سفر اولماز

هر چند کي ظاهرده يئتيب باشه حياتون

باطنده ولي بيردي حياتيله مماتون

تسخير ائلييب عالمي  اوصاف صفاتون

چوخ عاشق اولار سن کيمي شوريده سر اولماز

عالمده شهادت کيمي عالي سفر اولماز

سن بيرجه نفر يوخ کي بوگون بير جريانسان

بير بحر خروشنده و بير سيل دمانسان

ظلمتله برابر  دايانان نور فشانسان

چيخ اي گونشيم گويده کي سنسيز سحر اولماز

عالمده شهادت کيمي عالي سفر اولماز

اي اسوه آزادي و اي  مظهر غيرت

اي قددوه زيبنده سنون رخت شهادت

نصر آيه‌سيني آخدي قانين ائتدي تلاوت

يعني کي حقيقت قاني حاشا هدر اولماز

عالمده شهادت کيمي عالي سفر اولماز

اي سرو سنين داغووه باغ و چمن آغلار

بلبل گلر افغانه گل و نسترن آغلار

سوريه و لبنان و عراق و يمن آغلار

گئتديکجه بو قضه اوزانار مختصر اولماز

عالمده شهادت کيمي عالي سفر اولماز

اي سيد والا نصب اي زاده زهرا

باش اگمدين اشرار جفا پيشه‌يه حاشا

قانيلا وفا دفتريني ائيله‌دين امضا

عاشق ده اگر عشق اولا، اما اگر اولماز

عالمده شهادت کيمي عالي سفر اولماز