شعر از رضا غلامپور (دلپاک)
کپی آدرس
اشتراک گذاری در فیس بوک
اشتراک گذاری در تویتر
پست الکترونیک
اشتراک گذاری در لینکداین
اشتراک گذاری در واتساپ
اولموشام درد فراقه مبتلا قارداش رضا
جان وئرم بو درديلن اولما رضا قارداش رضا
ائيلمير محنت مدارا بو مريضه حاليله
طالعيم ائيلر کشاکش دلده کي آماليله
گل قوراخ بزم نيايش خاصه بير منواليله
من دئيوم آمين سن ائدوقجا دعا قارداش رضا
استجابت حاجت قلبيله مأنوس اولمادي
حاجت قلبيم روا بو يولدا افسوس اولمادي
چوخ تلاش ائتديم ولي قسمت منه طوس اولمادي
سالدي يولاردا مني دلدن بلا قارداش رضا
من غريبم گرچه اما بولمورم محنت ندور
غربت ايچره غم ندي غربت ندي عسرت ندور
بيگمان غربتدده بولمز غم غربت ندور
اولسا هر کيمسه سنيله آشنا قارداش رضا
علت درد وجوديمدي بو يولدا هر گزند
ائتمرم بو درديدن شکوه اولام گر بندبند
نه ملالت کي يولوندا دردمندم دردمند
آختارام هيهات بو درده دوا قارداش رضا
آختارار آخدوقجا اشکيم گوشه عمامه وي
ئوپموشام باخدوقجا دلده ناله خط خامه وي
صون نفسده قويموشام بو سينم اوسته نامه وي
سهل ائده جان وئرماقي بو زاره تا قارداش رضا
حالت جانکاهيمه جان اوسته واردور بير علل
مضطربدور بو يئره سندن قاباق گلسين اجل
گلمه ميش پيک اجل سن لطف قيل ديداره گل
سن گلن يولاره معصومه فدا قارداش رضا
عرصه محنتده يکسر تير غم آماجيم
قلب شان شانيله بيرده لطفوون محتاجيم
آل مني قارداش نظرده دل شکسته باجيم
خوشدي ائتسه باجيه قارداش عطا قارداش رضا
سانما جانيم وار کي چوخدان جان بدندن آيرليب
جان سنون تک غملي جاناندور کي مندن آيرليب
سن وطندن آيريلاندان جان بو تندن آيرليب
کي بو جانسيز تنده يوخ سنسيز قوا قارداش رضا
روزگار کج روش مندن آلان گوندن سني
گردشينده قهريله آغلار قويوب دائم مني
گل نه حاله گور ساليب آخر باجين معصومه ني
کيم قالير معصومه دن تک بير نما قارداش رضا
شمع تک واردور يانان جسميمده تا جان آغلارام
ناله قيلام گه هويدا گاهي پنهان آغلارام
ياده سالام محنتين هر لحظه هر آن آغلارام
ايلرم ني تک ملالوندا نوا قارداش رضا
گوئيا توش اولموشام من روزگارين قهرينه
قهري غرق ائتميش مني موج بلانين بحرينه
ممکن اولسا لطف قيل گل طوسيدن قم شهرينه
من ئولنده سن منه ساخلا عزا قارداش رضا
بير جهان محنت اورکده دلده بير دنيا سوزوم
آيريلاندان گوز گوزه سندن منيم آغلير گوزوم
سلب اولوب جاندان توانيم بيرده قلبيمدن دوزوم
تا آليب مندن سني اهل جفا قارداش رضا
چوخ چتيندور بلبل زاره اولا گلشن غريب
من غريبي ياده سال غربتده بيريول سن غريب
آغلارام تا واردي جانيم سن غريبه من غريب
آغلادوقجا سسلرم اي واي رضا قارداش رضا
تنگناي جسم روحه محبس غمناکيدي
بو بياني درک ائدر هر کيمسه کي»دلپاکيدي»
روحه منزلگه فلکدور جسمه مأوا خاکيدور
جسميدن نه غم اولور روحوم رها قارداش رضا
کپی آدرس
اشتراک گذاری در فیس بوک
اشتراک گذاری در تویتر
پست الکترونیک
اشتراک گذاری در لینکداین
اشتراک گذاری در واتساپ
بخش خبری آذربایجان
اظهار نظر 0
روزنامه به دیدگاه شما نیازمند است،از نظراتتون روی موضوعات پیشوازی خواهیم کرد.