رخصت ميدان

عموجان رخصت ميدان وئر ائتسين جان فداقاسم

اولوب سرمست جام البلا و للولا قاسم

فراز عرشدن باخسين آتام ميدان هيجايه

فنون رزميمي گورسون دئسين صدمرحبا قاسم

منه بالدان شيرين دير آستانيندا شهيد اولماق

سعادتدير کي يازسينلار شهيد کربلا قاسم

مگر تيغ جفائيلن جدا اولسون اليم يوخسا

ال اوزمز دامنيندن شهريارا مطلقا قاسم

دوشوبدور سايه تک آردينجا اي مهر جهان آرا

اوگوندن کي اولوب رمز وفايه آشنا قاسم

الا اي آفتاب آسمان عزو آزادي 

کي هر دم مهر روييندن ائدر کسب ضيا قاسم

شهادت حجله سين آماده ائتسينلر ملک لر قوي

 الينده قويسون اول بزم طربده  قان حنا قاسم

خلاصه اذن ميدان آلدي سلطان بلا‌کشدن

شعفدن آز قاليب آچسين پر اول فرخ لقا قاسم

سپاه ظلمتي تالان ائديبدير برق شمشيري

نه باشلار ائيلدي بير باش قيلينجيلان جدا قاسم

اوآزسِنّ ايله چوخ دشمن دن ائتدي دوزخه واصل

ستيغ عزته ووردي شهامتله لوا قاسم 

اوبچه شيري صيد ائتماقه روبه لر کمين ائتدي

نهايتده يئدي فرق سريندن بير يارا قاسم

يئخيلدي توپراغا يوز دوتدو شاه آسمان جاهه

عموجان داده گل اولموش فراقه مبتلا قاسم

شتابان گلدي چون بازشکاري باشي اوسته شاه

دئدي اي نور چشميم يادگار مجتبي قاسم

عمون اولسون سنه قربان سني کيم سالدي بو حاله

نه دندير ائتمه دي ماه جماليندان حيا قاسم

نقدري سسلدي سس گلمدي عطشان دوداقيندن

کي اولموشدي قتيل تيغ کين اشقيا قاسم

گتوردي آهيلن  يئردن خيامه حمل ائديب  نعشين

بويوردي چوخ چتين گلدي منه بو ماجرا قاسم

نئجه تاب ائيلسين مظلوم آنان بو داغ هجرانه

اولوبدور قامت صبري فراقيندان دوتا قاسم

علي اکبرين نعشي کناريندا دوتوبدور يئر

ديار نينواني ائيلييب غرق نوا   قاسم

اولوبدور قيد تندن طاير روحي رها اوچدي

رياض خلده زينت وئردي چون سرو رساقاسم

سرشکيلن شهودي يازدي بوابيات جانسوزي

شفاعت ائيلسين اوندان کي تا روز جزا قاسم