بير باجي قارداشين ايرانه کرم سايه سي واردي

شيعه‌يم، اهل ولايم، بو جلالت منه بسدي

بو جلالت، بو شرافت، بو سعادت منه بسدي

عاشقم، مفتخرم فاطمي يم، حيدريم من

گوهر عشق ولا آختارورام مشتريم من

الده سرمايه بودور آل علي نوکريم من

گر قبول ائتسه لر عالمده بو عزت منه بسدي

خلق ائديبدور مني حق، خلقتينين منتخبيندن

ايمنم عشق ولائيله خدانين غضبيندن

نعمت ارزاني اولوب چونکه ولايت سببيندن

نيلورم ثروت دنياني، ولايت منه بسدي

شکر اولا ائتمدي محروم مني حق کرميندن

رشته ي دل دولاشوب دوتدي ولايت علميندن

يول آچيب جنته آل اللهين الله حرميندن

ايلسم اونلاري هر يئرده زيارت منه بسدي

تاپمشام جنته يول آل عبانين حرميندن

دويمارام مين يول ئوپم کرب وبلانين حرميندن

اهل ايران شرف اخذ ائتدي رضانين حرميندن

سسلرم دل‌دن اوني ائتسه عنايت منه بسدي

واردي ايراندا ايکي گوهر، اصيل و نبوي دور

بير خانم قم-دادي معصومه عفيف و علوي دور

بيري سلطان کرم، صاحب ملک رضوي دور

بير يول اوندان ائلسم جلب رضايت منه بسدي

ايکي شهرين حرمينده بيزه جان مايه سي واردي

عشقيمين قمدا خراسانيده سرمايه سي واردي

بير باجي قارداشين ايرانه کرم سايه سي واردي

ايکيسيندن بيري گر ائتسه کرامت منه بسدي

جذبه‌ي عشق چکير جان و ديلي سوي بهشته

يول سالا کيم قم-يلان طوسه گئدير کوي بهشته

تشنه دير آهوي دل لب يئتيره جوي بهشته

باخسا اول ساقي ميخانه‌ي جنت منه بسدي

شرف ايرانيميزه لطف خدادن يئتيشيبدي

معرفت ملّتينه عشق ولادن يئتيشيبدي

وار اگر عزتيميز، بيل کي رضادن يئتيشيبدي

خوان احسانينه بيريول ائده دعوت منه بسدي