آهو

جانانه توسل ائلدون جانيله آهو

جان الده گوروشدون اودي جانانيله آهو

سالدون اوزووي خسته نفس اوچو اليندن

دامان شه عالمه ايمانيله آهو

هر گوشه داماني تجليگه لطفي

چاتدون کنف لطفه او دامانيله آهو

اولدي اورکين غم آرا چيرپينمادان آرام

باخدي يوزوه تا لب خندانيله آهو

تا دام اسارت سن ايچون قوردي رعيت

تاپدون ره حريتي سلطانيله آهو

ظلمت آرا پارلاق گونَشيله گونه چيخدون

دردين آراسي خوش اولي درمانيله

مرجان کيمي گوزياشي غمينده نجه‌ نظمه

گوردون چکيليب رشته مژگانيله آهو

تيکدون گوزوي گوزلرينه گوز گوزه ناگه

بير درد دل آچدون دل نالانيله آهو

بير کلمه دانشدون ائله کي سودامروندن

بير سودامره آغلادي افغانيله آهو

اوّل سنه بير حسن نظرله نظر ائتدي

سالدي سني آخر يولا احسانيله آهو

موج کرميندن نه بولور نهر کي خوشدور

دريا اوني تعريف ائده طوفانيله آهو

گتدون کي قيدون قدم ضامن صيد

صياد دوشوب حالت حيرانيله آهو

خوش حاليوه اقباليوه کي گويلووي آلدي

باخ گور نجه الطاف فراوانيله آهو

دلبندي جواده قسم آوازه ي جودي

دنياني دوتوب ساز کريمانيله آهو

بو دشت نه نخجيرگه غير کي بوردا

ايمندي شهنشاه خراسانيله، آهو

بير بيله عطوفت سبب اولدي تاپا الفت

تاريخ بويي مردم ايرانيله، آهو

نه جاي تحير نه تعجب کي دانشدي

هنگام خطر فخر سليمانيله، آهو

دلپاک تأمل ائله باخ گور نجه چاتدي

اؤز ائستکينه حال پريشانيله آهو