وداع از کربلا

آيريلور قارداش مَزاروندَن بَلالي زِينبُون

اِيلوري عَزم مَدينه کَربلالي زِينبُون

مُمکونُوم اوُلسا بُو قَبروندَن کنارَه گِئتمَرَم

تا حَياتيم وار جَوارِ رَحمتُون تَرک اِئتمَرَم

بُولمُوشَم گِئتسم داخي بيردَه وِصالَه يِتمَرَم

ماجَراسيندَن اوُلوب بير شَمّه حالي زِينبُون

دور اَياقه سال يُولا من گِئتملي مِهمانُوام

زِينبِ بَختِ قَرايَم دِيده سي گِريانُوام

آيريليق هِنگام دور قارداش حسين قُربانوام

آيريلور نِسگلّي قَبروندَن وَفالي زِينبُون

من گَلندَه سَن منَه قارداش حسين هَمراه دون

مايهء عِزّ و وِقار و طَمطراق و جاه دون

من سَنُون سايندَه بانو، سَن جَهانَه شاه دون

گِئتدي سَنلَه عِزّت و جاه و جَلالي زِينبُون

واريدي قارداش گَلَن وَقته مُجلّل مَحمليم

نه ساچيم بِيله آغارمُوش نَه بُوکُولموشدي بِئليم

اِيندي نَه وار قارداشيم نَه بير قَبيلَم نَه اِئليم

يَثربَه گِئتسُون نِئجَه ياسلي عَزالي زِينبُون

سَرو تَک قَدّيَم هاني بَس مُشک سا باشيم هاني

اَکبريم نُولمُوش جَوانانِ بَني هاشم هاني

جَعفر و قَاسم هاني بَس آلتي قارداشيم هاني

اوُلدي دنيادَه عَجب باشي قَرالي زِينبُون

قَلبيمي بي جا خَدنگِ حَسرتيلَه دَلمَرَم

تا وارام من بير دَقيقه نالَه دَن دِينجَلمَرَم

بُولموشَم بيردَه مَزارون اوُسته قارداش گَلمَرَم

حَسرتيلَه جان وِئرر قَلبي يارالي زِينبُون

من شَرارِ مُحنتيلَه دائماً دِل داغلارام

خونِ دِل اَشگيم کيمي قارداش عُذاره باغلارام

بُو يَتيمَه قزلارون باشه يغوب قان آغلارام

بيردَه شاد اوُلماز حسين غَم آشنالي زِينبُون

زِينبَه بَس دور ئولونجَه مايء دَرد و مُحَن

بير آدون بيردَه بُو قانلو پاره پاره پيرهَن

اِيلَرَم سَنسيز بَرادر يَثربي بِيت الحَزن

نالَه دَن دويماز بير آن نِي تَک نَوالي زِينبُون

اَمرِ دنيادَن دُوشن مُوقعدَه «عاصي» مُشکلَه

صِدقيلَه اِيله تُوسّل زِينبِ خونين دِلَه

اِسمي بير حَرز مُجرّب دور گتُور هر آن دِيلَه

قُورتارا غَمدُن سَني تا ذُوالجَلالي زِينبِون