مدح اميرالمومنين «عليه السلام»

اي هماي اوج رفعت يا اميرالمومنين

اي شکوه آدميّت يا اميرالمومنين

اي فروغ عدل و حکمت يا اميرالمومنين

اي يوزي مرآت غيرت يا اميرالمومنين

زنده دور سنله حقيقت يا اميرالمومنين

ختم اولوب سنده عدالت يا امير المومنين.

اي خداوند شجاعت حجت يکتا صفات

کون و امکانه اولان اعلا آدي رکن ثبا ت

 خلقته گرداب غمده سنسن اول فلک نجات

 اولماسيدون سن دولانمازدي بو چرخ کائنات

 ممکن اولدي قدرتونله دهريده ناممکنات

سنده دور اسرار خلقت يا امير المومنين

اي وجود اقدسي دين خدا سرمايه سي

اي کلام الله ناطق، حقين اي همسايه سي

اي شرف ديوانينين خوش منطقي آرايه سي

محکم اولدي همتونله دين و ايمان پايه سي

سالموسان سن عالم ايجاده  رحمت سايه سي

سن سن اول طوباي رحمت يا اميرالمومنين

يئرده سن آئينه ي ايزد نماسن يا علي

گويده اما عند ربّ لا يُراسن يا علي

سرّ حقه حکم وحيه آشناسن يا علي

انبيايه ياور و هم رهنماسن يا علي

در حقيقت خلقته مشگل گشاسن يا علي

يئر گويه وئردين جلالت يا امير المومنين

اولماسيدون، باغ خلقتده گورونمزدي صفا

اولماسيدون، سن جهالت دهري ائتمزدي رها

اولماسيدون، تنگناديدي تمام انبيا

اولماسيدون، کامل اولمازدي يقين دين خدا

اولماسيدون، فاطمه بي کفوّ اولاردي مطلقا

 سنله دور بانوي جنت يا امير المومنين

گور نه اندازه وئريب عزت، حق دانا سنه

مولد ائتدي کعبه ني خلّاق بي همتا سنه

غبطه ايلر اول سببدن حضرت عيسا سنه

افتخار ائتدي هميشه خلق آرا طاها سنه

وئردي آغوشينده مسکن خانه ي يکتا سنه

سندن آلدي کعبه رتبت يا اميرالمومنين

چشم دنيا گورممشدي سن کيمي آزاده مرد

تا قدم دنيايه قويدون اي ابرمرد نبرد

کعبيه زائر اولوبدي انبيا فرداً به فرد

حق سووندي باطلين رخسارينه اگلشدي گرد

 زايل اولدي چهره ي حقدن غبار رنج و درد

دست حقه گلدي قدرت يا اميرالمومنين

مردي و مردانگي سنله يئتيشدي عزته

گوهر ايمان يئتيب سنله حقيقي قيمته

کعبه ده دنيايه گتدي حق سني بو علته

خلق بيلسين خالقين سرور ائديبدي خلقته

اولسون آگه بيرده داراسن نئجه شخصيته

سندن ائتسين خلق اطاعت يا امير المومنين

سن کيمي عالمده مولا مرد کامل اولمادي

عدل و داده سن کيمي عالمده عامل اولمادي

زرق و برق عالمه سندن تعامل اولمادي

حق يولون طي ائيلدين مانع عوامل اولمادي

خوف و وحشت حاليوه بير لحظه شامل اولمادي

 روح آلوب سندن شجاعت يا امير المومنين

وصفيوه عاجزدي عالمده بشر انديشه سي

مدحوين قرآنيده محکم اولوبدي ريشه سي

ريشه سين اوردان قيرانماز بيرده ظلمون تيشه سي

کيمسه قرآن اهليدور، مدحون اولوبدور پيشه سي

شير حقين ملک قرآندور يقينا بيشه سي

واردي سنده چوخ فضيلت يا امير المومنين

باغ قرآندان اولا خوشدور بو طبعيم خوشه چين

عروه الوثقي دئييم، حبل الله و حبل المتين

معني ياسين والرّحمان و الاعلي سن يقين

هل اتي، هم واقعه، کهف امان، نوره قرين

معني انّا فتحنا سنسن اي  يعسوب دين

مومنون سندن عبارت يا اميرالمومنين

بير گوني دنيا سنون اي شاهکار لم يزل

کاميوه شيرين اولوبدي دهريده مثل عسل

امر ائديب اول گون رسوله خالق عزّ وجل

امر داداره رسول مصطفا ائتدي عمل

جحفه ده دوتدي الين مولا رسول بي بدل

شاد اولوبسان بير او ساعت يا اميرالمومنين